Një i vdekur dhe tre të plagosur është bulanci i një atentati ndodhur në Rrëshen këtë të martë.
Viktimë ka mbetur Martin Bardhi 61 vjeç i sapodalë nga burgu.
WebLajm sjell pamje nga vendngjarja, ndërsa hetimet paraprake janë fokusuar tek vrasje për hakmarrje. Bardhi një vit më parë u arrestua për atentatin ndaj Saimir Reçit, nipit të Kastriot Reçit të ekzekutuar me snajper më 7 janar 2020 po në Rrëshen.
WebLajm mëson se një vendim i gjykatës së Lezhës shpallur në muajin Korrik 2023 i ka dhënë lirinë Bardhit, duke i ndryshuar masën nga arrest në burg në detyrim paraqitje.
Njoftimi zyrtar i Policisë
Rrëshen/Informacion shtesë
Në vijim të informacionit të dhënë në lidhje me ngjarjen e ndodhur në Rrëshen, ku nga shtetas ende të paidentifikuar, u vra me armë zjarri shtetasi M. M. (B.)., ju informojmë se si pasojë e të shtënave, kanë mbetur të plagosur me armë zjarri, shtetasit I. B., I. B. dhe O. Gj., të cilët kanë qenë në afërsi të vendit ku ka ndodhur ngjarja dhe janë transportuar në spital, për të marrë ndihmën mjekësore.
Ndërkohë, në fshatin Gëziq, Mirditë, është konstatuar duke u djegur një automjet tip fuoristradë, që dyshohet se është përdorur nga autorët, për kryerjen e vrasjes.
Forca të shumta policie kanë rrethuar zonën dhe në ndihmë të Policisë lokale, janë nisur Forcat Speciale “RENEA” dhe FNSH, si dhe në Rrugën e Kombit, në drejtim të Kukësit, të Laçit, Lezhës dhe Dibrës, janë ngritur pika kontrolli.
Gjithashtu, drejt vendit të ngjarjes janë nisur Zv/drejtori i Përgjithshëm i Policisë së Shtetit dhe drejtorët e departamenteve të Policisë Kriminale, si dhe të Rendit dhe Sigurisë Publike.
Për zbardhjen e kësaj ngjarjeje është ngritur një grup i posaçëm hetimor, me specialistë nga Departamenti i Policisë Kriminale në DPPSH dhe nga Policia vendore, dhe në drejtimin e prokurorit, vijon puna intensive për identifikimin dhe kapjen e autorëve.
