Kryebashkiaku i Rrogozhinës, Edison Memolla ka deklaruar se nuk do të largohet nga posti i tij pa vendosur edhe shkalla e dytë e gjyqësorit ku ka ankimuar dënimin me 1 vit burg të dhënë nga GJKKO.
Memolla u shpall fajtor për akuzën e “Korrupsionit aktiv në zgjedhje” kryer në bashkëpunim duke e dënuar me 1 vit burg dhe ndalimin e ushtrimit të funksioneve publike për një periudhë 5 vjeçare.
Përmes një postimi në facebook, ai e quan vendimin të pambështetur në prova, prandaj do ta apelojë.
“Që kur mu besua detyra e përfaqësuesit të popullit tim, kam qenë në dijeni për peshën që do sillte në çdo dimension të sajin.
Drejtësinë e Re e kam mbështetur fuqimisht dhe si rrjedhojë jam i hapur të pranoj çfarëdolloj vendimi të dhënë kundrejt meje, por kjo nuk më pengon të apeloj një vendim i cili nuk është i mbështetur aspak në prova dhe fakte.
Theksoj se deri në një vendim të formës së prerë e më tej, unë jam kryetar i bashkisë Rrogozhinë, në krye të detyrës dhe i vetdijshëm për të gjitha përgjegjësitë që ky post sjell.
Së fundmi, ju falenderoj nga zemra të gjithë ju që keni qenë pranë meje duke më njohur, mbështetur si njeri, duke besuar të vërtetën time të pafajshme dhe s’më keni kthyer shpinën edhe kur situata duket e vështirë”-shkruan ai.
