SAMIR MANE, MILIARDERI I PARË SHQIPTAR NË LISTËN E FORBES REVISTA PRESTIGJIOZE: KA NJË PASURI PREJ 1.4 MILIARDË DOLLARË
Një sipërmarrës shqiptar futet për herë të parë në listën e miliarderëve më të pasur të botës, të publikuar nga revista prestigjioze *Forbes*. Bëhet fjalë për Samir Manen, pasuria e të cilit është vlerësuar në 1.4 miliardë dollarë.
Revista *Forbes* e ka përfshirë për herë të parë një sipërmarrës shqiptar në listën e njerëzve më të pasur të botës. Ai është Samir Mane, themeluesi dhe presidenti i *Balfin Group*, i cili është renditur në vendin e 2356-të me një pasuri prej 1.4 miliardë dollarësh.
“Diku tjetër në Evropë, Shqipëria ka miliarderin e saj të parë këtë vit, me hyrjen e re Samir Mane, i cili ka ndërtuar një pasuri të vlerësuar prej 1.4 miliardë dollarësh nga investimet në qendra tregtare, dyqane elektronike dhe pasuri të patundshme luksoze në mbarë Ballkanin,” – shkruan *Forbes Magazine*.
Kjo është pasuria më e madhe e certifikuar ndonjëherë për një sipërmarrës shqiptar nga revista prestigjioze *Forbes*, e cila ka bërë traditë publikimin e listës së njerëzve më të pasur të globit që prej vitit 1987.
Me një aktivitet të nisur në vitin 1993, Mane themeloi më pas grupin *Balfin*, duke e shndërruar atë në një nga grupet më të mëdha investuese në rajon, që tashmë ka zgjeruar investimet edhe në Austri, Shtetet e Bashkuara të Amerikës dhe Kanada.
*Forbes* shkruan se tani ka më shumë se 3 mijë miliarderë në mbarë botën dhe se ata janë më të pasur se kurrë, me një pasuri të përbashkët prej 16.1 trilionë dollarësh.
Vetëm tre vende përbëjnë më shumë se 50% të të gjithë miliarderëve. Thuajse një e treta e listës së këtij viti vjen nga Shtetet e Bashkuara, që renditen të parat me 813 miliarderë.
Kina mban sërish vendin e dytë me 450 miliarderë, dhe India në vendin e tretë me 205 miliarderë.
Në Evropë, vendin e parë e mban Gjermania me 171 miliarderë.
