Vatikani ka konfirmuar datën e funeralit të Papa Françeskut, i cili u nda nga jeta në moshën 88-vjeçare. Ceremonia mortore do të mbahet ditën e shtunë.
Në testamentin e tij të fundit, Papa kërkoi që të varrosej në Bazilikën e Shën Marisë në Romë me mbishkrimin e emrit të tij papal në latinisht: Franciscus.
Në shumë shtete, flamuri i Vatikanit është ulur në gjysmështizë. Ndeshjet e futbollit në Itali dhe Argjentinë u pezulluan për nder të Papës.
Papa Françesku vdiq pas një goditjeje në tru dhe ataku kardiak.
Papa u shtrua në spital për disa javë në muajin Shkurt, pasi vuante nga pneumonia e dyfishtë. Ai u kthye në Vatikan në mes të Marsit dhe bëri daljen e fundit publike të dielën e Pashkës, një ditë para se të ndahej nga jeta.
Papa Françesku, Papa i parë nga Amerika Latine, drejtoi kishën prej 1.4 miliardë anëtarësh që nga viti 2013.
