Sukseset e yllit botëror, këngëtares me origjinë shqiptare Dua Lipa vijojnë të shtohen çdo ditë e më shumë.
Tashmë Dua Lipa ka hyrë histori si artistja e parë grua, e cila ka katër këngë në platformën “Spotify” që tejkalojnë 2 miliardë dëgjime secila.
Dhjetorin që lamë pas, platforma “Spotify raportoi se Dua Lipa renditej së bashku me emra si Billie Eilish apo Olivia Rodiguez me këngë të cilat kalonin 2 miliardë dëgjime.
Por tashmë ajo qëndron e vetme në këtë klasifikim si këngëtarja grua me 4 këngë që kalojnë këtë shifër të lartë dëgjimesh.
E para renditet kënga “Don’t start now” e dëgjuar rreth 2.5 miliardë herë, më pas kënga “One Kiss” me 2.1 miliardë dëgjime, “New Rules” me rreth 2 miliardë herë, e ndërsa kohët e fundit ka qenë pikërisht kënga “Levitating”që ka tejkaluar këtë shifër.
Sa i përket rekordit mes të gjithë këngëtarëve e mban artisti The Weeknd me “Blinding Lights” që është dëgjuar mbi 4 miliardë herë.
