Dorëheqjet mbeten edhe në vitin 2023, shkaku kryesor për largimet nga administrata publike.
Të dhënat zyrtare nga Departamenti i Administratës Publike tregojnë se lirimet në tërësi janë në rritje, duke evidentuar si shkak edhe ndëshkimet.
Raporti vjetor i DAP tregon se në total, gjatë vitit 2023, janë liruar gjithsej 496 nëpunës civilë ku për dorëheqje, 221 punonjës. Ndërkohë arsyeja e dytë me numrin më të lartë ka të bëjë me daljen në pension me 132 punonjës dhe largim nga shërbimi civil si masë displinore ishin të tretat si arsye me 27 punonjës.
Më pas vijnë me radhë humbja e jetës së punonjësit në 7 raste, ristrukturim 1 rast, lirim për shkak të performancës dy raste, refuzim i transferimi për shkak të ristrukturimit katër raste, dënim me vendim të formës së prerë për kryerjen e një vepre penale katër raste dhe arsye të tjera të parashikuara në ligj 92 raste.
“Nga analiza e të dhënave në lidhje me lirimet, vihet re se gjatë vitit 2023 numri total i lirimeve në krahasim me vitin 2022, është rritur me 12.5%. Gjithashtu, vihet re se për vitin 2023, në krahasim me vitin 2022 janë: ulur me 15.% rastet e lirimeve me dorëheqje; ulur me 5% rastet e lirimeve për arsye të plotësimit të moshës së pensionit; rritur me 42.1% rastet e lirimeve për shkak të masës disiplinore “Largim nga shërbimi civil”; ulur me 50% rastet e lirimeve për shkak të ristrukturimit” vlerëson DAP.
Ndërkohë gjatë vitit që lamë pas janë marrë masa disiplinore për 97 raste. Konkretisht, gjatë këtij viti numri i nëpunësve civilë të administratës shtetërore që kanë qenë subjekt i masës disiplinore ishin të ndarë në 1 nëpunës (ose 1%) i përkasin kategorisë së mesme drejtuese, 16 nëpunës (ose 16.5 %) i përkasin kategorisë së ulët drejtuese, 80 nëpunës (ose 82.5 %) i përkasin kategorisë ekzekutive.
“Numri i nëpunësve civilë, të cilët kanë qenë subjekt i masës disiplinore “Largim nga shërbimi civil” ishte 27 nëpunës ose 27.8%e totalit të nëpunësve që kanë qenë subjekt i masave disiplinore. Sipas kategorive të klasifikimit të pozicioneve, 4 nëpunës ose 14.8%e tyre i përkasin kategorisë së ulët drejtuese dhe 23 nëpunës ose 85.2%e tyre i përkasin kategorisë ekzekutive” nënvizon raporti.
