Bashkia e Tiranës ka vendosur të transformojë statusin e klubit në organizatë jofitimprurëse.
Lajmin e mirë e dha kryetari i Bashkisë së Tiranës, Erion Veliaj pas mbledhjes së Këshillit Bashkiak. “Tirana u bë temë e ditës sepse tre mundësit fantastikë që garuan në Paris, dy prej të cilëve sollën medalje olimpike për herë të parë, jo vetëm për Klubin e Tiranës, por edhe për Shqipërinë.
Kjo solli më shumë vëmendje te Klubi i Tiranës. Shumë prej klubeve kanë bërë kalimin në shoqatë, si mundësi për të marrë financime nga kompani private dhe sponsorë komercialë, prandaj po bëjmë të njëjtën gjë me
Klubin e Tiranës.
Bashkia e Tiranës do vijojë të mbetet mbështetësi kryesor i klubit të Tiranës, por kalimi në një qendër, siç kanë bërë gjithë klubet e tjera private, na jep shumë më shumë mundësi për ta fuqizuar, për t’i dhënë më shumë financa, sipas performancave dhe arritjeve të lojtarëve të klubit”, tha Veliaj.
Gjithashtu, Bashkia e Tiranës ka bërë të ditur se të gjitha asetet dhe pasuritë e përdorura nga Klubi Sportiv “Tirana” do të transferohen te qendra e re, duke siguruar që klubi të vazhdojë aktivitetet e tij pa ndërprerje dhe të ruajë titujt e arritur ndër vite.
Ky transformim pritet të forcojë më tej pozicionin e klubit në arenën sportive kombëtare dhe ndërkombëtare, ndërsa klubit do t’i ofrohen mbështetje financiare nga buxheti i Bashkisë për periudhën 2025-2027. Me këtë ndryshim, Klubi Sportiv “Tirana” synon të ruajë emrin, reputacionin dhe historinë e tij, duke ndjekur rrugën e suksesit në nivel kombëtar dhe ndërkombëtar./SuperSport
