Një ngjarje e rëndë ka ndodhur në Memaliaj, ku dy persona kanë marrë peng një 53-vjeçar dhe e kanë kanosur atë.
Mësohet se Pajtim Selimi është mbajtur peng brenda një banese në Memaliaj nga dy persona të cilët i kanë bërë presion për t’ju dorëzuar shuma parash dhe asete në pronësi të tij.
Shtetasja Lavdije Çaushi, 45 vjeç i ka ngritur një kurth atij, teksa e ka thirrur në banesën që kishte marrë me qira në Memaliaj. Ajo është ndihmuar nga 38-vjeçari Edi Tafili për të realizuar ngjarjen.
Këto dy persona kanë arritur t’i marrin viktimës vetëm 100 euro dhe pasi është liruar, Selimi e ka denoncuar rastin në polici. Policia pas orësh kërkime ka arritur të vërë në pranga të dy pengmarrësit.
Viktima ka thënë para hetuesve se i njihte të dy autorët e ngjarjes, por nuk ju detyrohej asnjë vlerë financiare.
Njoftimi nga policia:
I hoqën lirinë një 53-vjeçari dhe e kanosën për t’i marrë një shumë parash, falë reagimit të menjëhershëm të shërbimeve të Komisariatit të Policisë Gjirokastër, identifikohen dhe arrestohen 2 autorët e dyshuar.
Sekuestrohen një shumë parash dhe 2 celularë.
Shërbimet e Komisariatit të Policisë Gjirokastër, pas njoftimit se 2 shtetas i kishin hequr lirinë, një 53-vjeçari, duke e mbajtur kundër vullnetit të tij si dhe e kishin kanosur me qëllim dhënien e një shume parash, kanë organizuar menjëherë punën për kapjen dhe vënien e autorëve të dyshuar përpara përgjegjësisë ligjore.
Si rezultat i veprimeve të shpejta të specialistëve për Hetimin e Krimeve të Komisariatit të Policisë Gjirokastër, janë identifikuar, kapur dhe arrestuar autorët e dyshuar, shtetasit:
L. Ç., 45 vjeçe, banuese në Gjirokastër dhe E. T., 38 vjeç, banues në Krahës, Memaliaj për veprat penale “Heqja e paligjshme e lirisë”, “Shtrëngimi me anë të kanosjes ose dhunës për dhënie pasurie”, kryer në bashkëpunim.
Nga veprimet hetimore dyshohet se këta 2 shtetas, për motive të dobëta, kanë mbajtur në banesën e marrë me qira nga 45-vjeçarja, shtetasin P. S., 53 vjeç, duke i hequr lirinë atij, si dhe e kanë kanosur për dhënie pasurie.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
